دعم رسالة الموقع

بسم الله الرحمن الرحيم

أنا شادي العارف بالله، مؤسس موقع عارف أونلاين. أول موقع عربي متخصص في الأونلاين بزنس.

رسالة الموقع هي مساعدة الشباب أنهم يبدأوا في تحقيق أحلامهم و أهدافهم المشروعة في الحياة، من خلال إنشاء عمل علي الانترنت، و اللي هوه أونلاين بزنس، أو بزنس علي الإنترنت.

في الحلقات الصوتية اتكلمت كتير عن إمكانية بدء الأونلاين بزنس لأي شخص مهما كانت أمكانياته المادية، و إن مش ضروري الواحد علشان يبدأ إنه ياخد كورس أو دورة تدريبية بفلوس كتير. قبل حتي ما يحس بالعائد من الموضوع ده.

علشان كدة قررت من البداية، إني أقدم المعرفة و المعلومة و الخطوات اللي تساعد الشباب يبقي عندهم بزنس. و تكون الخدمة دي بدون مقابل مادي.

بمعنى، إني مش هاعمل أي محتوى مخصص للناس اللي عاوزين يبدأوا في شكل كورس بمقابل. كل المعلومات و المعرفة اللي بانقلها هاتكون مجانية، علشان احقق الهدف و رسالة الموقع. و أخلي الشباب مايحملوش هم تكاليف زيادة ووقت ضايع في بداية رحلتهم.

من وقت للتاني هاتلاقي في محتوى الموقع وفي صفحة الموارد لينكات أو روابط لخدمات أو منتجات بأرشحهالك وممكن تفيدك في مشوارك في الأونلاين بزنس، بعض من الشركات اللي عاملين الخدمات و المنتجات دي عملت اتفاقية معاهم بحيث أدعم موقع عارف أونلاين بنسبة عمولة بسيطة، و ده لما زائر الموقع يشتري المنتج أو يشترك في الخدمة دي من خلال اللينك بتاعي.

على سبيل المثال، لو أنا حاطط لينكات لأكثر من شركة استضافة مواقع، و إنت قررت إنك تختار شركة أنا عامل معاها اتفاقية لدعم الموقع. في الحالة دي هاتشتري انت المنتج من خلال اللينك بتاعي بنفس التكلفة اللي هاتدفعها لو دخلت على موقعهم مباشرة. و في أوقات كتيرة هاحاول اني اخد خصم من الشركات دي بحيث أساعدك تدفع أقل من إنك تروح مباشرة علي اللينك بتاع الشركة. وده أكيد هايوفرلك فلوس و يحقق هدف و رسالة الموقع.

اللينكات و التوصيات دي، بتبقي لمنتجات أنا واثق فيها و متأكد إنها هاتساعدك في مشوارك. مش هاتلاقي أبدا لينكات لشركات سمعتها سيئة أو خدمتها وحشة.

في أي وقت من حقك إنك تدخل مباشرة على عناوين الشركات دي بدون ما تستخدم اللينك بتاعي. لكن لما تستخدم اللينك، تبقى بتدعم استمرارية الموقع و الرسالة اللي بأحاول أقدمها على المدى الطويل بإذن الله.

شكرا جزيلا لدعمك،

في رعاية الله

أخوك/ شادي العارف بالله.