حلقة (30) – نشر و طرح المنتج عن طريق القائمة البريدية، اعلانات أمازون و التخفيضات

اهلا و سهلا بيكم في ملخص الحلقة رقم (30) من عارف أونلاين بودكاست، اتكلمت في الحلقة دي في النقاط التالية:

اسمع الحلقة هنا أو نزلها و اسمعها براحتك

  • مقدمة
    • في ال4 حلقات اللي فاتوا اتكلمنا عن كل مراحل بدء مشروع أمازون لحد شحن المنتج من المصنع في الصين لأمريكا.
    • النهاردة هانتكلم عن الحاجات اللي بتعملها و انت مستني الشحنة توصل لأمريكا ثم لأمازون.
    • بدون الحاجات دي منتجك مش هايبيع و غالبا مش هاينجح على أمازون.
    • لإن علشان تستمر على امازون و تكسب كويس، المفروض يكون منتجك ظاهر في الصفحة الأولي لنتائج كلمة بحث معينة.
    • علشان الترتيب بتاعك يزيد، المفروض تبيع كويس بشكل يومي من أول البداية.
    • و التقييمات تكون كويسة بعد ما تبيع.
  • الدعاية من خلال القائمة البريدية
    • من أول حلقات البودكاست و أنا باتكلم عن أهمية القائمة البريدية علشان اللخظة دي.
    • لو عندك جمهور و متابعيين حقيقيين مش بس على الفيسبوك، على القائمة البريدية اللي تقدر توصل لكل الناس فيها بدون تكاليف جديدة و اعلانات، نسبة نجاحك على أمازون هاتبقي كبيرة جدا باذن الله.
    • كل اللي هاتعمله انك هاتبعت للناس و تعرفهم ان فيه منتج ممكن يفيدهم في حل المشكلة اللي انت بتتكلم عنها و بتحاول تحلها في الموقع و القائمة البريدية بتاعتك.
    • هاتعمل تخفيض مخصوص ليهم عن طريق كوبون أو تخلي السعر مخفض لفترة معينة و تقولهم عليها.
  • الدعاية من خلال مواقع العروض و التخفيضات
    • لو عندك أو معندكش قائمة بريدية، ممكن تعمل حساب على موقع من مواقع التخفيضات الخاصة بأمازون و تحط منتجك عليهم.
    • أهم و أشهر موقعين حاليا هما com و موقع JumpSend.com
    • بتحدد عدد الوحدات اللي عاوز تبيعها في اليوم و تحط الكوبونات بتاعتك.
    • بعد كدة بتجيلك مبيعات يومية بالتخفيض اللي انت عامله علشان أمازون يبدأ يعملك ترتيب عندهم. و في نفس الوقت تبدأ تبيع.
  • الدعاية من خلال اعلانات أمازون
    • نشر إعلانات مدفوعة لمنتجك على أمازون هي الطريقة اللي هاتستخدمها في كل الأحوال. لإنك بتبقي في الصفحة الأولى لكل كلمات البحث اللي بتعرض إعلان منتجك عليها.
    • الإعلان بيبقي ظاهر قدام الناس اللي عاوزة المنتج مباشرة، و طبعا حسب القيمة اللي هاتدفعها هايبقي اعلانك في الصفحة الأولى أو الثانية و هكذا.
    • طبعا الناس هاتضغط على إعلانك لو الصورة كويسة و التقييم مش سئ و السهر أكيد مناسب.
  • نظام المتابعة بالرسائل للحصول على تقييمات العملاء
    • علشان تبدأ يجيلك تقييمات من الناس اللي اشترت، أفضل طريقة انك تبعتلهم إيميلات تطلب منهم ترك تقييم صادق بدون دفعهم لإعطاء تقييم خمس نجوم، علشان ده ضد سياسة أمازون.
    • الشركة اللي باستخدمها اسمها Feedback Genius
    • بتسجل عليها و تربطها بحسابك على أمازون.
    • و ممكن تختار نظام متابعة من الموجودين، و تحدد عدد الأيام بعد كل طلب لمنتجك من خلال العميل، اللي بعدهم يتبعت الأيميل المطلوب في نظام المتابعة.
    • مثال: أول ما العميل يشتري يتبعت إيميل شكر للعميل، أول ما المنتج يوصل بيوم يتبعت ايميل يشكر العميل تاني و يطلب منه إعطاء تقييم للبائع مش للمنتج. بعد أسبوع من وصول المنتج يتبعت إيميل تالت يطلب من العميل ترك تقييم على المنتج.
    • أهمية طلب تقييم البائع في الأول قبل تقييم المنتج هو ان لو العميل عاوز يسيب تقييم وحش، يكون بعيد عن المنتج و تقدر تعالج المشكلة بدون ترك أثر سلبي على صفحة المنتج بتاعك.
    • طبعا العميل لو متضايق جدا أو حتى مبسوط جدا من المنتج مش بينتظر إيميلات المتابعة و بيدخل يحط تقييم مباشرة.
  • خدمة العملاء
    • اللي بيتولى خدمة العملاء بشكل أساسي في أمازون هو أمازون نفسه.
    • لكن في بعض الأحيان العميل بيبعت مباشرة للبائع اللي هوه انت علشان يطلب حل لمشكلة في المنتج او استبدال لمنتج في عيب.
    • في الحالة دي لازم تكون سريع في الرد جدا و تساعد العميل و تبادر بتقديم الحلول حتى لو كان فيها استبدال أو حتى ارسال وحدة جديدة من المنتاج كهدية.
    • ماينفعش تتعامل مع العميل على أمازون بمبدأ التخوين و تسأله كانك وكيل نيابة زي ما بنشوف من المحلات في مصر. لإن لو ملاقاش الحل عندك ولقى اسلوبك وحش هايشتكي لأمازون و هايسيب تقييم وحش و كمان ممكن صفحة المنتج بتاعك تتقفل عادي جدا.
    • مهم جدا كمان انك ترد على التقييمات الإيجابية بالشكر، و ترد على التقييمات السلبية بإنك تبدا بالاعتذار حتى لو انت مش مقتنع، و تبدي الرغبة في حل المشكلة و المساعدة مهما كانت.

موارد الحلقة

روابط:

نزّل خطة الصفحة الواحدة و اشترك في قائمة النجاح مع عارف أونلاين

* indicates required

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *