حلقة (27) – البحث عن المنتجات المربحة لأمازون و الموردين

اهلا و سهلا بيكم في ملخص الحلقة رقم (27) من عارف أونلاين بودكاست، اتكلمت في الحلقة دي في النقاط التالية:

اسمع الحلقة هنا أو نزلها و اسمعها براحتك

Podcast: Play in new window | Download (Duration: 25:30 — 46.7MB)

اشترك في البودكاست Subscribe Email | RSS

مقدمة
- أول و اهم مرحلة في التجارة على أمازون هو البحث عن منتج مربح.
- علشان تلاقي منتج مربح، لازم تاخد وقتك في البحث و التحليل و المقارنة بين المنتجات علشان لما تختار منتج يبقى معاه اكبر احتمالات للنجاح.
- بعد اختيار المنتج تيجي عملية اختيار المورد الكويس او الــSupplier، و دي في نفس اهمية اختيار المنتج لان علاقتك مع المورد مع نجاح المنتج هي علاقة طويلة المدى، لو حصل مشاكل بعد كدة بتكون سبب في خسارة المنتج نفسه.
بحث و اختيار المنتج
- أسرع و أسهل طريقة للبحث عن منتجات هي البحث في أمازون نفسه.
- ممكن البجث عن طريق محرك البحث او عن طريق استعراض و تصفح الأقسام و الأقسام الفرعية.
- أحسن حاجة انك تدخل في الاقسام الفرعية بعمق علشان تلاقي منتجات ليها قابلية للنجاح و اقل تنافسية.
- لما بتلاقي منتج مناسب زي ما هاقول بعد كدة، بتروح على موقع علي بابا و تدور على نفس المنتج هناك و تشوف تكلفة التصنيع الموجودة على ALIBABA مقابل سعره على أمازون و تحاول تستنتج هامش الربح.
- في صفحة بتحسبلك تلقائي على موقع امازون “اللينك بتاعها في آخر الملخص” تقدر تدخل عليها بيانات تقريبية للمنتج المحتمل و تعرف تقريبا ممكن تاخد كام صافي ربح بعد خصم مصاريف أمازون.
- المنتج بتاعك حاول يكون سعره من 15 – 45 دولار تقريبا على أمازون علشان تخرج من نقطة صعوبة اتخاذ القرار و المقارنة بينك و بين منتجات تانية من جهة العميل.
- حاول تختار منتج حجمه لا يتعدى العلبة اللي بتحط فيها الحذاء. علشان مصاريف الشحن و مصاريف أمازون تكون في المعقول.
- عدد التقييمات أو آراء الزوار مايزيدش عن 200 تقريبا لأفضل المنتجات و أكثرها مبيعا على الصفحة الأولى. لإن لو اكتر من كدة فأنت هاتحتاج توصل للعدد ده على منتجك علشان تقدر تبيع و تنافس و تنجح. لان ساعتها هايبقي واضح ان المنتجات المشابهة ليك بتعتمد تماما على عدد التقييمات و جودتها.
- فيه رقم ترتيب او RANK اسمه BSR أو Best Seller Rank، ده بيحدد حجم المبيعات للمنتج. حاول تخليك في المنتجات اللي لما بتكون في الصفحة الاولى بيبقي الترتيب بتاعها بين 2000 و 5000 علشان تقدر في البداية تنافس.
- ممكن تعرف بشكل تقريبي حجم المبيعات المقابل لكل رقم BSR حسب قسم المنتج من خلال موقع Jungle Scout و اللينك بتاعه تحت في الملخص.
- اختار المنتج اللي عليه اقل مشاكل بشكل عام، يعني تجنب الالكترونيات و المواد الغذائية أو المنتجات اللي بتلامس مواد غذائية أو ممكن يكون ليها اي نسبة ضرر. لتتجنب المشاكل.
اختيار الموردين
- بتدخل على com تبحث في الSuppliers عن المنتجات.
- تدخل كلمات البحث المرتبطة بالمنتج اللي انت عاوز تبيعه، و لما تظهر نتائج البحث لازم تعمل فلتر.
- الفلتر ده تعمله بإنك تعمل Check على علامة Gold Supplier و علامة Trade Assurance و يفضل كمان علامة Assessed Supplier.
- الــGold Supplier هو مورد مشترك مع com و بيدفع مبلغ ليهم و بيبقي فيه نوع من المصداقية و الضمان انه مورد حقيقي مش نصاب.
- الــTrade Assurance هي خدمة من Alibaba لما بيشترك فيها الموردين، بتسمحلك تدخل علي بابا كضامن لعملية التعاقد، و بتدفع من خلال علي بابا و بيضمنلك جودة المنتج و التسليم او استرداد فلوسك.
- الــAssessed Supplier بيكون مورد اتعمل عليه تفتيش او تقييم من خلال شركة خارجية و بيبقي معاه شهادة بالتقييم ده تقدر تنزلها و تقراها.
- بتختار الموردين بعد كدة من حيث MOQ، و الاسعار المبدئية.
- ثم تبعتلهم من خلال واجهة علي بابا من بروفايل كل مورد تفتحه.
- بعد كدة تعمل Excel Sheet أو حتى جدول ملف Word أو حتي على ورقة كراسة. و تسجل فيها الموردين اللي ردوا عليك بس خلال 24 ساعة. اي حد يرد بعد كدة طنشه.
- من أهم الاسئلة اللي تسألها للموردين و تسجل اجاباتها: أقل كمية في الOrder، نوعية الخامات، نوعية التغليف، طرق الدفع المقبولة، طرق و قيمة ارسال العينات، هل بيعلموا أي تعديلات في المنتج و بيحطوا اللوجو بتاعك، هل بيعلموا تغليف و بيحطوا كود المنتج بتاعك و بيقبلوا الفحص و المراجعة للمنتج قبل الشحن من خلال شركة من طرفك.
- كود المنتج هو الــUPC Code بتشتريه من على النت و تسجله على أمازون.
- ممكن تديلهم كود المنتج UPC Code، أو الكود بتاع Amazon اللي هتاخده لما تسجل الشحنة في أمازون. الأفضل طبعا لتقليل التكاليف و الاجراءات انك تخليهم يلزقوا أو يطبعوا كود أمازون مباشرة طالما هاتبيع من خلال أمازون فقط في البداية.
- طبعا هاتبدأ تعمل فلترة للموردين حسب ردودهم و ارتياحك ليهم، و خصوصا من حيث اتقانهم للغة الانجليزية و مهارات التواصل بشكل عام.
- و لما يوصلوا في الفلترة لثلاثة موردين بس اطلب منهم يبعتلولك عينات.
- و طبعا لما توصل العينات و تجربها بنفسك، هاتختار مورد واحد بس.
ادخال التحسينات او التعديلات على المنتج و بدء عملية الطلب
- من أهم الحاجات اللي المفروض تعملها في البحث بتاعك، إنك تقرا كويس تقييمات المنتجات المنافسة ليك، و خصوصا اللي درجة التقييم من 3 و إنت نازل. و تشوف العيوب اللي الناس بتشتكي منها ثم تصلحها في المنتج بتاعك.
- التصليحات دي و التحسينات هي اللي هاتميزك و هاتكتبها في صفحة المنتج بتاعك لما تنشره.
- بعد الاتفاق على كل شئ، هاتعمل عقد مع المورد بتاعك و تكون واضح ومحدد في كل تفاصيل المنتج و الاتفاق بشكل عام.
- صمم انك تعمل الطلب بتاعك من خلال Alibaba Trade Assurance خصوصا في اول كذا تعامل مع المورد، و خلي اقصى دفعة مقدمة 30% و الدفعة الأخيرة 70% بعد الاستلام و الشحن.
فحص المنتج قبل الدفع و الشحن
- مهم جدا إنك تعمل فحص و مراجعة للمنتج قبل الاستلام و الشحن و قبل الدفعة الاخيرة من المبلغ.
- الفحص ده بيبقي من خلال شركة Inspection في الصين. و لازم تكون شركة متجربة.
- الشركة دي بتروح في الموعد المتفق عليه و تعمل فحص يا اما عشوائي يا اما شامل.
- بعد الفحص بيبعتولك تقرير بالجودة و الصور بتاعة المنتج و المشاكل و هكذا للرفض او القبول، و ممكن التفاوض مع المورد لتصليح الاخطاء.
- أنا بانصح بعمل فحص شامل للتاكد من تلافي كل العيوب، علشان ماتاخدش تقييمات وحشة على أمازون و تقتل المنتج بتاعك في مهده.
- بعد قبول التقرير و المنتج بشكل عام، بيتم الشحن ثم الدفع.

موارد الحلقة

روابط:

شارك الفائدة مع أصدقائك

موارد الحلقة

إبدأ هنا و نزّل خطة الصفحة الواحدة

مقالات مرتبطة

الردود على الموضوع