التعاملات البنكية

Hesham Morsy asked سنتين ago

صباحك سعيد بشمهندس  كنت محتاج اسأل حضرتك إيه نوع الحساب بالظبط اللى افتحه ببنك HSBC اللى يخلينى أقدر أربطه بالباى بال و البايونير و اللى ميعمليش مشاكل بعد كده فى سحب و إيداع الفلوس ؟ مشاكل سواء من سياسات البنوك الألكترونية او سياسات إدارات البنوك فى مصر  ؟ و كمان هل لازم يكون ليه عنوان إفتراضى فى امريكا و حساب بنكي أمريكى فعلي هناك و لا لأ ؟ و هل ينفع افتح حساب بنكي أمريكي هنا من غير ما أسافر أمريكا و لا لأ؟ و لو ينفع إيه شروطه ؟ ولك جزيل الشكر  ملحوظه  لو شايف حضرتك إن الأسألة دى ممكن يتم نشرها للعامه عشان الناس تستفيد انا معنديش مانع تفتح خصوصية السؤال للعامة او انشره أنا مرة اخرى بصيغة الإستعارة فى قسم جواب و سؤال  اى بدون ذكر إسم بنك محدد  

1 Answers
شادي العارف فريق العمل answered سنتين ago

صباح الخير استاذ هشام.
في البداية بالفعل كل أسئلة حضرتك مهمة لكل الناس لأنهم أكيد عندهم نفس التساؤلات،  فلو أمكن نشر جميع الأسئلة ما عدا السؤال اللي بتقول فيه اهدافك للمشروع و تفاصيل شخصية.
اسم البنك في حد ذاته مش مشكلة. انا مثلا قولت اني باتعامل مع البنك ده، دي مش معلومة خاصة اوي الا للناس اللي مش ماشيين مضبوط و خايفين حد يحجز على فلوسهم . و ده ولا أنا ولا حضرتك الحمد لله. بس القرار يرجعلك في الآخر.
إجابة سؤالك، باذن الله تفتح حساب جاري شخصي بالجنيه أو الدولار.
لو هاتفتح شركة في أمريكا من على الإنترنت هاتحتاج عنوان افتراضي.
و مش هاتقدر تفتح حساب بنك في أمريكا الا لو رحت أمريكا او ليك حد هناك تعمله تفويض و تحط اسمه في ورق رسمي للشركة يثبت أنه تبعها،  و بيبقى هوه المفوض المعتمد مش حضرتك. يعني لازم بردو تروح علشان تقدر تخلي اسمك على الحساب.
 

Hesham Morsy replied سنتين ago

طيب فى حاجة أنا عشان افتح حساب بايونير إنهاردة محتاج إجراءات إيه بنكية فعلية عشان الحساب يكون مضمون و ميتعرضش للقفل من بايونير لأنى قلقان بعد كده من مراجعتهم يكتشفوا حاجه مش مظبوطه و انا مش حابب كده لأنى محتاج امشى سليم من البداية
هل محتاج الحساب الجارى اللى حضرتك قولت عليه ده فقط ؟!

شادي العارف فريق العمل replied سنتين ago

مش محتاج اي إجراءات غير مستندات شخصية زي الرقم القومي و الباسبور و كل المعلومات تبقى حقيقية و بيانات حساب البنك اللي قولنا عليه. طول ما ورقك سليم و معلوماتك صحيحة مفيش اي مشاكل باذن الله.

Hesham Morsy replied سنتين ago

شكرا لحضرتك
هستأذنك لو بإيدك تخلي السؤال للعامه إتفضل إعمله للعامه

شادي العارف فريق العمل replied سنتين ago

تم.
شكرا لتعاون في نشر الفائدة.