حلقة (8) – إزاي تعمل موقع إنترنت؟

بأتكلم في الحلقة الثامنة من عارف أونلاين بودكاست عن إنشاء موقع الإنترنت و استضافته، و بالأسفل ملخص الحلقة:

اسمع الحلقة هنا أو نزلها و اسمعها براحتك

Podcast: Play in new window | Download (Duration: 41:09 — 75.3MB)

اشترك في البودكاست Subscribe Email | RSS

• موقع الإنترنت عبارة عن شوية صفحات فيها محتوي، الصفحات دي بتتكون من ملفات صور أو فيديوهات … و ملفات نصية متربطة ببعض بحيث تظهرلك الشكل اللي انت بتشوفه.
• الملفات دي محطوطة علي جهاز كمبيوتر متوصل بالانترنت 24 ساعة و محفوظ في مركز بيانات أو Data Center
• علشان تبدأ تعمل موقع انترنت. ممكن تبدأ ببلاش، بس علشان تعمل بزنس بجد لازم تدفع شوية تكاليف بسيطة لحجز اسم موقعك و استضافته و هكذا.

• الإستضافة

  • زي ما قلت قبل كدة استضافة موقعك بالضبط زي تاجير مكتب في مبني إداري في القرية الذكية.
  • موقعك هوه المكتب، و السيرفر هوه المبني، و مركز البيانات او الداتا سنتر هوه القرية الذكية.
  • يعني كل مركز بيانات فيه عدد كبير من السيرفرس، و كل سيرفر عليه عدد كبير من المواقع. زي ما القرية الذكية فيها مباني ادارية و كل مبني فيه مكاتب.
  • الاستضافة المجانية ولا المدفوعة:
    • في كل الأحوال من باب التجربة ممكن تبدأ علي استضافة مجانية برغم عيوبها لحد ما ترقي موقعك لاستضافة مدفوعة.
    • عيوب الاستضافة المجانية:
      • غالبا بيحطوا اعلاناتهم علي موقعك بالعافية.
      • مساحة محدودة جدا لموقعك.
      • خصائص مجدودة.
      • تقريبا مفيش دعم فني خالص لو حصل مشاكل.
      • التحكم في موقعك محدود.
      • ممكن يمسحوا او يقفلوا موقعك في اي وقت و لأي سبب و ماتعرفش تتلكم لانك مش دافع حاجة.
    • الاستضافة المدفوعة مافيهاش كل العيوب دي مع أي شركة محترمة.
  • استضافة البريد:
    • سيرفر البريد اللي مع الاستضافة، ولا خدمة بريدية خارجية؟
      • أولا المقصود هو إن اي استضافة مواقع بيبقي معاها استضافة لبريدك الالكتروني بردو، و بتقدر تشوف رسايلك من صندوق بريد بيبقي مرفق في لوحة التحكم او بتضبطه علي الكمبيوتر بتاعك أو موبايلك.
      • ممكن تكون محتاج خصائص و امكانيات اكبر من اللي بتتقدملك مع الاستضافة، و في الحالة دي ممكن تروح لشركات بتقدم خدمات و مزايا افضل زي مايكروسوفت أو جوجل.
      • في البداية خالص مش مستاهلة تروح لشركات تانية، بس لما الموضوع يكبر أنصحك بترقية البريد لشركة كبيرة.
      • لأنها بتبقي شركة متخصصة و احتمالية المشاكل في البريد بتاعك بتبقي قليلة او غير محتملة بعكس شركات الاستضافة العادية.
    • Office 365 vs. G Suite by Google
      • الخدمتين بيدولك خصائض كتيرة مش بتاخدها مع الاستضافة العادية للموقع.
      • زي: برامج لتحرير المستندات او documents ، مساحة لتخزين و مشاركة الملفات، وسائل لتنظيم المهام، برامج تواصل نصي او صوتي او فيديو، ده غير مزايا تانية كتير بجانب خدمة البريد الالكتروني.
      • لكن مايكروسوفت بتتميز جوجل في الآتي وده المهم:
        • من ارخص باقة، مايكروسوفت بتديلك مقابل 6 دولار في الشهر:
          • 50GB للبريد بتاعك
          • 1TB للملفات بتاعتك
          • امكانية استخدام تطبيقات MS Office علي الانترنت مش علي جهازك. لو حبيت ترقي للباقة الاعلي ب15 دولار في الشهر، بتقدر تنزل Office  علي جهازك.
        • ارخص باقة في جوجل ب5 دولار بتديلك:
          • 30GB لكل حاجة.
          • و التطبيقات اللي بتستخدمها بتبقي بتاعت جوجل.
  • مقارنة أفضل شركات استضافة المواقع:
    • BlueHost
      • أول باقة بتبدأ من حوالي 4 دولار في الشهر الأول و بعد كدة بتبقي ب8 دولار كل شهر.
      • بتحط موقع واحد و بتحجز اسم موقعك مجانا “حجز الدومين بره بيبقي حوالي 12في المتوسط دولار في السنة”.
      • بتاخد 50GB مساحة لموقعك.
      • و حد اقصي 5 عناوين بريد الكتروني، مساحة كل واحد فيهم 100 ميجا بس.
      • وهي مرشحة من WordPress نفسه كأفضل استضافة ليه.
    • HostGator
      • أول باقة بتبدأ من حوالي 4 دولار في الشهر الأول
      • مساحة غير محدودة “عندي تحفظ علي الموضوع ده”.
      • موقع أو دومين واحد.
      • بتاخد ما يعادل 100 دولار اعلانات علي جوجل مجانا.
      • بتاخد ما يعادل 100 دولار اعلانات علي Bing مجانا.
      • بريد الكتروني لانهائي من حيث العدد و المساحة.
    • و بشكل عام مهما كان اختيارك. فا انت ممكن تجرب شهر، ولو حبيت تغير ممكن تنقل موقعك الشهر اللي بعده. بس دول من افضل مقدمي الاستضافة حاليا.

  • اسم الموقع Domain name

    • اهم اختيار هاتعمله في البداية، هوه اسم الموقع. لانه هوه اسم البراند بتاعك.
    • بتحجزه في البداية و تجدده كل سنة و بيفضل معاك طول الوقت حتي لو غيرت الاستضافة.
    • اسم الموقع هوه اسم النطاق، هوه الدومين ، و هوه Domain name.
    • علشان تختار اسم كويس، هاقولك بعض النصائح من موقع Godaddy نفسه و هوه اكبر مسجل اسماء مواقع علي الانترنت:
      • سهل الكتابة.
      • قصير
      • مكون من كلمات معبرة عن البزنس أو المحتوى بتاعك.
      • دخل موقعك الجغرافي في الاسم لو البزنس بتاعك محلي.
      • تجنب الأرقام و الشرطات.
      • سهل الناس تفتكره.
      • مايكونش ماركة مسجلة لشركات تانية او حتي اسم شركة تانية داخل فيه.
      • اختار امتداد مناسب و معبر عن نشاطك. الامتداد هوه دوت كوم أو دوت نت. مثلا، .info للمواقع العملية و .org للمنظمات أو المؤسسات الخيرية و هكذا.
      • احجز الاسم اللي قررت تاخده بسرعة علشان الاسماء بتتحجز بسرعة جدا، و ممكن حد ياخده.
    • ازاي تحجز:
      • بتدخل علي موقع حجز الدومين، تدخل الاسم و الامتداد بتاعه في خانة البحث، ولو طلع متاح للتسجيل بتكمل في اجراءات الحجز و الدفع.
      • بعد الدفع الاسم بيبقي بتاعك لمدة سنة ولازم تجدده قبل نهاية المدة علشان مايروحش عليك و حد يحجزه.
      • بعد كدة بتوجهه علي عنوان الاستضافة بتاعك. هانشرح ازاي في فيديو مستقل.
    • الشركات اللي بتحجز و معروفة هي NameCheap، GoDaddy، BlueHost، HostGator. قارن اسعارهم و شوف بنفسك.
    • لو حجزت الدومين مع نفس شركة الاستضافة بيبقي افضل من الناحية التقنية علشان هما بيضبطوا كل حاجة. مع العلم ان Bluehost بيدولك اسم الدومين ببلاش مع الاستضافة.
    • لكن لو عاوز يبقي الدومين بتاعك اللي هوه اسم من الاستضافة و هوه اسم البراند بتاعك يبقي مستقل عن شركة الاستضافة لأي ظروف، يبقي الأفضل تروح لشركة تسجيل دومين مختلفة عن الاستضافة.

  • نظام ادارة المحتوي CMS

    • هوه عبارة عن برنامج أو Software علي الانترنت، بيساعدك إنك تبني و تصمم و تدير موقعك و محتوياته بطريقة سهلة و بسيطة جدا.
    • قبل البرامج دي ما تطلع، كان لازم اللي يدير الموقع ده يكون حد فاهم برمجه كويس علشان يقدر يعدل او يرفع محتوي جديد علي الموقع.
    • أو يكون المبرمج عامل نظام شبيه بالــCMS يقدر اصحاب الموقع يعدلوه من نظام ادارة للموقع بداخله.
    • أفضل CMS حاليا من التجربة و الخبرة و ترشيحات المواقع الكبيرة هوه WordPress.
    • WordPress هو أقوي و اسهل نظام ادارة محتوي.
    • فيه برامج CMS كتير اخرى ممكن تبحث عنها بس انا هاركز في البودكاست علي WP.
    • المكونات الرئيسية: المقالات، الصفحات، الاضافات، المستخدمين، القوالب.
    • WordPress ممكن يستخدم بطريقتين:
      • تنزله ببلاش من org او تحمله مباشرة من خلال شركة الاستضافة بتاعتك علي مساحة الموقع بتاعك. ودي بتسمحلك تستخدم كل الخصائص.
      • أو، تدخل علي com و تسجل مجانا بدون اسم موقع خاص بيك و تبدأ تنشئ محتوي. بس بتاخد خصائص محدودة جدا و بتحتاج تعمل ترقية للباقة بتاعتك بفلوس علشان تاخد امكانيات اكتر.

  • حاجات تاخد بالك منها:

    • تجنب الاستضافة المجانية، لو عاوز تبني بزنس حقيقي.
    • ما تروحش لشركات استضافة تحت السلم علشان رخيصة.
    • تجنب المواقع المبرمجة يدويا مقارنة بالــCMS. يعني ماتجبش مبرمج يعملك موقع و انت لسة بتبدأ، لان الموضوع مكلف و مش مستاهل في الأول.

موارد الحلقة

روابط:

• جروب خليك عارف arefonline.com/g
• صفحة الفيسبوك arefonline.com/f
• تويتر arefonline.com/t
• يوتيوب  arefonline.com/y
• Bluehost.com
• Hostgator.com
• Godaddy.com
• NameCheap.com
• GSUITE: https://gsuite.google.com
• Office 365:   https://products.office.com/EN/?ms.url=office365com
• WordPress.com
• WordPress.org